Ingunn ÓlafsdóttirRáðinn hefur verið nýr mannauðsstjóri Biskupsstofu. Hún heitir Ingunn Ólafsdóttir og er lögfræðingur að mennt. Mun hún hefja störf á hausti komanda.

Ingunn lauk lagaprófi (cand.jur gráðu) frá Háskóla Íslands, þar sem hún lagði m.a. áherslu á vinnumarkaðsrétt og LLM gráðu frá Johann Wolfgang Goethe Universität. Þá hefur hún lokið diplómanámi í viðskiptafræði auk náms í markþjálfun frá Háskólanum í Reykjavík.

Ingunn starfaði sem mannauðsstjóri hjá Flugmálastjórn og Flugstoðum á árunum 2001-2010 þar sem hún stýrði starfsþróunar- og launadeild. Þar bar hún m.a. ábyrgð á endurmenntun starfsmanna, gerð og eftirfylgni mannauðsstefnu, hafði umsjón með starfsþróunar- og fræðsluáætlunum, sá um ráðningar og samhæfingu á launum starfsmanna. Auk þess kom hún að gerð kjarasamninga en hún var í samráðsnefnd stofnunarinnar og stéttarfélaga og sat fundi hjá ríkissáttasemjara vegna samninga við ákveðnar starfsstéttir.

Við sameiningu Flugstoða og Keflavíkurflugvallar, í félagið Isavia árið 2010, færðist Ingunn í starf lögfræðings og skrifstofustjóra yfirstjórnar Isavia þar sem hún sinnti öllum lögfræðilegum verkefnum félagsins sem m.a. vörðuðu vinnumarkaðs- og samningarétt.

Árið 2014 hóf Ingunn störf sem mannauðsstjóri hjá Eflu, verkfræðistofu og dótturfélögum, hér á landi og erlendis. Starf hennar þar hefur m.a. falist í stefnumörkun mannauðsmála, gerð og eftirfylgni mannauðsstefnu, starfsþróun, innleiðingu rafræns fræðslukerfis, gerð og eftirfylgni mannauðsferla, túlkun kjarasamninga og umfjöllun um atriði er varða vinnumarkaðsrétt. Þá stýrði hún jafnframt innleiðingu á nýrri persónuverndarreglugerð sem og innleiðingu og vottun á jafnlaunastaðli og tekur virkan þátt í gæðaráði fyrirtækisins.