Krossarnir farnir
Þessir krossar stóðu við Kögunarhól, Suðurlandsveg, alls 52 að töluÁrið 2006 voru reistir 52 stórir krossar við áningarstaðinn hjá Kögunarhóli rétt vestan við Selfoss. Hvítir krossar sem vegfarendur tóku vel eftir þegar þeir óku þar hjá. Krossarnir stóðu allþétt saman og veður og vindar léku um þá allan ársins hring.
Þegar kirkjan.is ók þar framhjá í gær var enga krossa að sjá við Kögunarhól. Þeir voru horfnir. Þar var aðeins að sjá mörg vegavinnutæki og verkamenn að störfum.
Tvöföldun Suðurlandsvegar stendur yfir. Þarft verk og gott.
En af hverju voru þessir krossar settir upp og hvað veldur því að þeir eru nú horfnir?
Leiðin milli Hveragerðis og Selfoss - og Reykjavíkur og Selfoss - hefur kostað nokkur mannslíf. Þetta er hættulegur hluti af Suðurlandsvegi.
Krossarnir voru settir upp við látlausa og fallega athöfn í desember 2006 sem sr. Úlfar Guðmundsson þáverandi prófastur Árnesinga stýrði.
Hugsun Hannesar var sú að krossarnir gætu verið fólki ábending um að leiðin um þennan veg gæti verið hættuleg og að ökumenn þyrftu að sýna varkárni við aksturinn. Hannes vildi líka láta lýsa veginn upp. Krossarnir yrðu svo teknir niður þegar tvöföldun vegarins væri lokið.
Það vita allir að krossinn er trúartákn. Tákn upprisu og eilífðar. En kross er líka merki um burtför úr heiminum, dauða.
Tvöföldun vegarins er hafin og henni lokið á köflum. Kirkjan.is spurðist fyrir um málið hjá Vegagerðinni á Selfossi og fékk þau svör að krossarnir hjá Kögunarhóli hefðu verið teknir niður því að þeir voru inni á framkvæmdasvæði þar sem verið er að undirbúa tvöföldun þessa kafla Suðurlandsvegar.
Kirkjan.is ræddi við Birki Hrafn Jóakimsson, verkfræðing hjá Vegagerðinni, sem hefur yfirumsjón með þessum öðrum áfanga á breikkun Suðurlandsvegarins, og spurði hann út í krossana. „Jú, við gáfum verktakanum fyrirmæli um að taka þá niður,“ sagði Birgir Hrafn, „við tókum krossana í geymslu og það verður ákveðið síðar hvað verður gert við þá.“
Hann sagði ýmsar hugmyndir hafa komið fram um hvað gera ætti við krossana. Ein hugmynd væri sú að koma þeim fyrir ofar í Kögunarhólnum. En ekkert væri ákveðið, þetta yrði gert í samráði við þá sem hefðu með krossana að gera. Það sama á við um stuðlabergsstöpulinn með skiltinu.
Stefnt er að því að ljúka þessum öðrum áfanga Suðurlandsvegar haustið 2023.
Krossarnir við Kögunarhól voru gott framtak og bak við það bjó falleg hugsun og kærleiksrík. Hannes lést fyrir sjö árum, blessuð veri minning hans. Nú verður Suðurlandsvegur smám saman öruggari en áður og ekki eins mikil þörf á þessum sérstöku krossum sem blöstu svo lengi við frá veginum. En kannski fara þeir ofar í Kögunarhólinn í framtíðinni - aldrei að vita. En alltaf verður þó þörf á að vegfarendur aki þar um með gætni og varúð.
hsh
Stuðlabergsstöpullinn sem stóð hjá áningarborðinu við Kögunarhól
Hér voru krossarnir og áningarborðið - og stuðlabergsstöpullinn
