Messuhald í útvarpi

Hópurinn úr Njarðvíkurprestakalli með söngmálastjóra þjóðkirkjunnar

Í sveitum og bæjum um allt land eru kirkjur þar sem fram fer trúar- og menningarstarfsemi í þeim mæli sem hvert byggðarlag kýs sér. Öll eru þessi guðshús notuð til messuhalds og kirkjulegra athafna. Hvert og eitt þeirra segir frá sínu samfélagi í orðum og tónum. Í helgihaldi og menningarstarfsemi.

Útvarpsmessur eru gluggi sem lokið er upp og öllum landsmönnum boðið að hlýða á boðun guðsorðs og menningu í byggðarlögum sem allir kannast við en fæstir hafa kannski setið þar á kirkjubekk.

Undanfarin sjö ár hefur hljóðupptökubíll Ríkisútvarpsins brunað út á land í þann mund sem farfuglarnir streyma til landsins. Hljóðnemum og köplum hefur verið komið fyrir í einni kirkju og þangað hafa söfnuðir komið og flutt sína messu. Þessar guðsþjónustur hafa verið fluttar á Rás 1 (rás hins hugsandi manns) yfir sumartímann.

Margrét Bóasdóttir, söngmálastjóri þjóðkirkjunnar, hefur haldið móðurlegri og styrkri hendi yfir öllu skipulagi en hljóðar hendur tæknimannsins Einars Sigurðssonar hafa haldið um tæknimálin.

Allt er breytingum háð. Kórónuveiran gerði margvíslegan usla sem öllum er kunnur. Það stóð til að taka upp ellefu messur í Austurlandsprófastsdæmi en veiran var snöggtum þéttari en Austfjarðarþokan og setti það strik í reikninginn svo að þeim upptökum varð að fresta um ár.

Nú voru góð ráð dýr. Engum kom til hugar að slá af útvarpsmessur sem hafa verið í útvarpi frá upphafi vega. Leitað var til frækinna Suðurnesjamanna sem hafa sótt margan sjóinn svo sæmd er af og voru þeir fúsir til að hlaupa í skarðið. Hvað annað. Enda blóð þeirra „ólgandi sem hafið og eldfjallaglóð.“

Sandgerðiskirkja varð fyrir valinu, fallegt hús með góðu Johannus orgeli og flygli – og hljómburður góður. Þar voru hljóðritaðar fimm messur í byrjun júnímánaðar og þeim verður útvarpað á tímabilinu 28. júní til 9. ágúst.

Hlustendur eiga því von á fjölbreyttum og vönduðum messum frá söfnuðum Suðurnesja í sumar, en einnig verður útvarpað frá Skálholtshátíð, Reykholtshátíð og Hólahátíð eins og venja er til.

mb/hsh

Útvarp Reykjavík, útvarp Reykjavík...

Suðurnesjaklerkar með Vox Felix

Útskálaklerkur sr. Sigurður Grétar með sínu fólki

Keflavíkurklerkar og kirkjukórinn þeirra

Fólk úr Tjarnaprestakalli með klerki sínum

Það var nú alltaf góður hljómur í þessum ferðaútvarpstækjum á sínum tíma
- nú eru þau eftirsótt og tilheyra „retro-tískustraumi“