Með skýrum friðarboðskap

beðið fyrir friði í Úkraínu/mynd: Church of Scotland

Í liðinni viku hafa margir viðburðir átt sér stað í kirkjum landsins sem tengjast ástandi heimsmála eins og fjallað hefur verið um hér. 
Ekkert lát verður á og nú um helgina verður beðið fyrir friði í kirkjum landsins vegna stríðsátaka í Úkraínu. Forseti Íslands mun ásamt formanni félags Úkraínumanna á Íslandi flytja ávarp í samstöðumessu Dómkirkjunnar á sunnudag.

Líkt og komið hefur fram í hugvekju biskups nær ástand heimsmála sem fyrr inn í þann veruleika sem kirkjan bregst við, meðal annars með fulltingi Hjálparstarfs kirkjunnar og á þeim vettvangi sem samkirkjuleg mál heyra undir. Þjóðkirkjan vill sýna öllum þeim sem líða samstöðu, þeim sem trúa og vona og biðja fyrir friði, jafnt sem þeim sem eru á flótta og þeim sem leita skjóls í öryggi hefða og siða sem tilheyra kristnum trúararfi.

Afstöðuleysi Kýrils Patríarka gagnvart stríðsrekstri rússneskra stjórnvalda er áhyggjuefni vegna alls hins góða starfs sem unnið er á vegum Alkirkjuráðsins og Evrópska kirkjuráðsins þar sem kirkjudeildir heimsins hafa unnið saman að einingu og friði. Því má ætla að mikilvægi alls samkirkjulegs starfs verði enn greinilegra á komandi misserum þar sem flóttafólk frá bæði Úkraínu og Rússlandi mun þurfa stuðning víðara samfélags kristins fólks til að iðka trú sína á nýjum stöðum.  Hugleiðingu frá sóknarpresti Dómkirkjunnar má finna hér. 

Að lokinni messu í Dómkirkjunni mun Guðni síðan bregða sér yfir í Kolaportið - eins og honum er einum lagið - og flytja ávarp fyrir söfnuðinn sem þar kemur saman. 

Þar verður bæði beðið fyrir friði og spilað bingó - því öll verðum við jú einnig að myndast við að halda í gleðina. 

amf/