Birgir Rafn Styrmisson er fæddur á Akureyri 1. nóvember 1950, sonur Kristínar Sigurðardóttur og Styrmis Gunnarssonar, Benediktssonar prests og rithöfundar. Hann er kvæntur Brynhildi Báru Ingjaldsdóttur og eigum þau tvö börn. Birgir Rafn starfaði við prentverk frá árinu1968 - 1977. Gerðist síðan togarasjómaður um tveggja ára skeið. Hóf störf hjá Almennum tryggingum, síðan Sjóvá og starfaði þar til ársins 2018 en þá lét hann af störfum. Hann hefur starfað í sóknarnefnd Akureyrarkirkju, einnig þar sem meðhjálpari og sungið í kór kirkjunnar. Birgir Rafn sat tvö kjörtímabil á kirkjuþingi fyrir Eyjafjarðar- og Þingeyjar prófastsdæmi.

Hvað er áhugaverðast við það að sitja á kirkjuþingi?
Kirkjuþingsfulltrúar og starfsmenn þingsins eru þvílíkt öndvegisfólk að í allri þessari alvöru sem einkennir þinghaldið, var skemmtun að vera þarna innanborðs.

Hvaða ráð myndir þú gefa þeim sem hafa áhuga á að bjóða sig fram til setu á kirkjuþingi?
Ef þú hefur áhuga á þingsetu skalt þú vanda framboð þitt. Sendu kjörmönnum persónulegar upplýsingar um þig, og fyrir hvað þú stendur. Hringdu í þá, hvern og einn þegar nær dregur kosningum. Ég fékk mjög góðar viðtökur símtala, fólk hefur almennt mikin áhuga á að ræða málefni kirkjunnar.

Hvað kom þér mest á óvart í störfum kirkjuþings?
Það kom mér á óvart hversu stórt bil var á milli þingsins og kirkjuráðs. Ráðið var oft ekki að fara eftir samþykktum þingsins, eða koma þeim í réttan farveg. Málafátækt var nokkuð áberandi, sömu málin á dagskrá þing eftir þing.

Hvernig fannst þér andrúmsloftið og samstarfsandinn hafa verið á kirkjuþingi?
Starfsandi og andrúmsloft fannst mér notalegt, þó svo að stundum yrðu orðahnippingar sem eðlilegar voru í stórum málum.

Er eitthvað eitt sem stendur upp úr í minningunni frá tíma þínum á kirkjuþingi?
Frumvarp til nýrra þjóðkirkjulaga er stórt í endurminningunni. Lítið sem ekkert hnikuðust þau áfram þing eftir þing.