Fallegt sumarstarf
Í Vindáshlíð - stúlkurnar mála steina, skrifa og teikna á þá, raða þeim við húsvegg eða göngustíga - mynd: hshÞað er upplifun að koma í Vindáshlíð á sólríkum sumardegi.
Staðurinn er umvafinn fallegum trjágróðri og frá honum leggur ilm og angan sem sem gestir kunna vel að meta. Finna fljótt að þeir eru komnir í sælureit umgirtan fögrum fjallahring sem er eins og virkisveggur. Hér er öruggt og gott að vera.
Öll aðstaða til sumarbúðahalds er þar til fyrirmyndar. Vistleg húsakynni, góður matsalur á efri hæð hússins, með litlum hliðarsal þar sem er samkomusalur. Niðri í nýja húsinu er stór samkomusalur með upplyftu sviði í endanum. Þá er kirkja á staðnum, Hallgrímskirkja, og íþróttahús. Umhverfið vel skipulagt í náttúrunni og fallegt – útileiktæki hér og þar.
Sumarbúðir í Vindáshlíð rekja sögu sína til ársins 1947 og það er KFUM og KFUK sem rekur þær með myndarlegum hætti. Í vor var þess minnst með hátíðarbrag að 75 ár voru liðin frá því að sumarbúðastarfið hófst. Starfið stendur á gömlum merg og hefur verið afar farsælt.
Þegar kirkjan.is gekk inn í fordyri aðalhússins blasti við stór skóhilla með alls konar skóm í fjölbreytilegum litum. Snyrtilega raðað upp.
Það var kyrrð yfir öllu þó þangað væru rúmlega áttatíu stúlkur nýkomnar á staðinn. Nokkrar stúlkur sátu og spjölluðu saman en flestar höfðu farið í gönguferð upp að fossi í Selá sem kallast Brúðarslæða. Stúlkurnar eru á aldrinum níu til ellefu ára.
Hún heitir Elísa Sif Hermannsdóttir sem var forstöðukona yfir þessum hópi sem var svo að segja nýkominn. Elísa Sif hefur unnið ellefu sumur í Vindáshlíð og þykir afar vænt um staðinn og starfið sem þar er unnið. Sjálf vinnur hún sem sýningarstjóri hjá Þjóðleikhúsinu en getur ekki látið hjá líða að taka vinnuskorpur í Vindáshlíð.
Kirkjan.is spyr um hvernig matseðillinn sé á staðnum – og hvort borgarstúlkurnar séu matvandar.
„Aldeilis ekki,“ segir Elísa Sif, „þær borða allan venjulegan heimilismat en að sjálfsögðu er tekið tillit til allra sem hafa einhvers konar fæðuofnæmi.“
Stúlkurnar, eða Hlíðarmeyjar, eins og þær kallast líka, sofa í herbergjum þar sem eru átta kojur. Á hverju kvöldi eru beðnar bænir með þeim inni á herbergjunum, og fer ein bænakona (sem svo er kölluð) inn í hvert herbergi. Það er vel séð fyrir öllu, bæði fæðu andans og líkamans.
Þær fara í alls konar leiki, þær lesa og teikna, fá fræðslu, mála steina, fara í gönguferðir, fótbolta, nota íþróttahúsið mikið, sveifla sér í hinni sívinsælu aparólu, föndra eitt og annað eins og vinabönd, skreppa niður í Skiptagil og leika sér þar í læknum, vaða og busla ... þannig mætti lengi telja. Það er nánast aldrei auð stund.
Þegar gengið er um sumarbúðirnar í Vindáshlíð kemur sagan upp við hvert fótmál. Fjöldi fólks hefur lagt sumarbúðunum lið allt frá upphafi. Sjálfboðaliðar hafa unnið gríðarlega mikið fyrir búðirnar eins og lesa má um í sögu sumarstarfs KFUK.
Kirkjan í Vindáshlíð á sér merka sögu. Hún stóð áður í Saurbæ á Hvalfjarðarströnd, vígð 1878, og var flutt þaðan þegar ný kirkja var reist 1957. Sóknarnefnd Saurbæjarsóknar gaf KFUK gömlu kirkjuna. Það var umfangsmikið verk að flytja hana en allt fór vel. Kirkjan komst í höfn, í Vindáshlíð. Hún var svo endurvígð 16. ágúst 1959. Kirkjan á marga góða gripi sem hún fékk að gjöf. Helgihald fer þar fram og stúlkunum er sagt frá kirkjunni, ýmsum siðum og frá sr. Hallgrími Péturssyni.
En skyldi gemsinn eitthvað þvælast fyrir ungu stúlkunum?
„Alls ekki,“ segir Elísa Sif, „línurnar eru alveg hreinar að hann er ekki leyfður og þær virða það algjörlega – enda hafa Hlíðarmeyjarnar svo mikið að gera að undratækið snjallsíminn gleymist.“
Sumarbúðirnar í Vindáshlíð bjóða upp á ýmsa flokka: ævintýraflokk, dvalarflokk, unglingaflokk, stubbaflokk, mæðgnaflokk, kvennaflokk og jólaflokk. Aldursbilið í þessum flokkum er frá átta ára upp í hundrað ár!
hsh
Vindáshlíð - verið er að gera við gamla húsið
Röð og regla á hlutunum
Elísa Sif Hermannsdóttir, forstöðukona, og ráðskonan Marta Kristín Friðriksdóttir
Kirkjan.is heimsótti Vindáshlíð undir öruggri leiðsögn Ragnheiðar Sverrisdóttur, djákna, (til vinstri) en hún er öllum hnútum kunnug á staðnum - Elísa Sif Hermannsdóttir, forstöðukona, fræddi okkur um sumarbúðastarfið
Búið að leggja kökur á borð í björtum og hlýlegum matsal Vindáshlíðar
Kremið á skúffukökum getur verið í ýmsum litum - alltaf jafn gott
Alltaf er farið með borðbænir
Íþróttahúsið er glæsilegt og mikið notað
Gólfið í íþróttahúsinu spegilgljáandi
Í herbergjunum eru átta kojur
Allt er vandað - fallegir ísaumaðir gardínukappar sem einhver velunnari Vindáshlíðar hefur gert
