Nýtt orgel í Grafarvogskirkju

Sunnudaginn 18. september kl. 11:00 verður vígt nýtt orgel í Grafarvogskirkju.
Er það af gerðinni C.F. Walcker. Orgelið er byggt af Aeris Orgona í Budapest.

Í frétt frá Grafarvogskirkju segir: „Hljóðfærið er 21. aldar sköpun sem sprengir tæknilega veggi og takmarkanir fortíðar og tekur skýrt mið af E.F. Walcker orgelum 19. aldar. Orgelið er 33 radda og inniheldur um 3000 pípur. Orgelið hefur nútímalegt útlit og er með fullkomnum stafrænum búnaði“.

Biskup Íslands, frú Agnes M. Sigurðardóttir vígir orgelið við upphaf hátíðarguðsþjónustu á sunnudaginn. Allir kórar kirkjunnar syngja, prestar og djáknar þjóna ásamt biskupi Íslands og fyrrum sóknarpresti safnaðarins.

Tvö ný orgelverk verða flutt í guðsþjónustunni, forspil og eftirspil. Annað er eftir Hákon Leifsson organista Grafarvogskirkju og hitt er eftir Gísla Jóhann Grétarsson.
Þá verða sungnir sálmar eftir báða organista safnaðarins, Hákon Leifsson og Láru Bryndísi Eggertsdóttur.

Boðið verður upp á veitingar að guðsþjónustu lokinni.

Orgeltónleikar

Sama dag eða sunnudagskvöldið 18. september kl. 19:30 verða orgeltónleikar í kirkjunni.
Hinn víðkunni orgelleikari, professor Hans-Ola Ericsson leikur á orgelið tónlist eftir Bach, Sibelius, Haydn, Brahms, Lindberg, Clara Schumann, Fanny Mendelssohn, Ericsson ofl.
Aðgangur er óleypis á tónleikana en framlög í orgelsjóð eru vel þegin á staðnum eða í gegnum heimasíðu Grafarvogskirkju Grafarvogskirkja

slg

Myndir með frétt