Mikill undirbúningur í kirkjum landsins

Jólahátíð í fossvogsprestakalli

Á vetrarsólstöðum er undirbúningur í fullum gangi í kirkjum landsins fyrir hátíð ljóss og friðar.

Áhugavert er að fylgjast með öllu því sem kirkjan hefur upp á bjóða.

Flest prestaköll og prófastsdæmi hafa sínar eigin heimasíður eða facebook síður þar sem hægt er að fylgjast með hvað boðið er upp á.

Nokkur prestaköll vilja nýta sér þennan miðil, kirkjan.is til að koma á framfæri því sem fram fer.

Svo er um Fossvogsprestakall sem farið hefur þess á leit við fréttaritara kirkjan.is að birta dagskrá helgihaldsins yfir jóla og áramót.


Aftansöngur verður á aðfangadagskvöld klukkan 18:00 bæði í Bústaðakirkju og Grensáskirkju.

Fyrr um daginn eða klukkan 16:00 á aðfangadag verður barna- og fjölskyldustund í Bústaðakirkju.

Miðnæturguðsþjónusta verður síðan í Grensáskirkju á jólanótt og hefst hún kl. 23:30.

Hátíðarguðsþjónusta verður á jóladag klukkan 13:00 í Bústaðakirkju og klukkan 14:00 í Grensáskirkju.

Kirkja heyrnarlausra mun hafa sitt jólahelgihald á öðrum degi jóla kl. 14:00 í Grensáskirkju, eins og undanfarin ár.

Jólaball fer fram í Bústaðakirkju 27. desember kl. 15:00 þar sem góðir rauðklæddir gestir munu heimsækja kirkjuna.

Sungið verður og dansað í kringum jólatréð.

Um áramótin verður aftansöngur í báðum kirkjum, Bústaðakirkju og Grensáskirkju, á gamlársdag klukkan 18:00.

Á nýársdag verður hátíðarguðsþjónusta klukkan 13:00 í Bústaðakirkju og klukkan 14:00 í Grensáskirkju.

slg