Æði-flæði í Hallgrímskirkju

Hallgrímskirkja verður með Æði-flæði listasmiðjur fyrir börn og unglinga frá janúar og fram í mars 2023.

Samkvæmt auglýsingu frá Hallgrímskirkju verður flæðið í smiðjunum æðislegt, skapandi og skemmtilegt.

Það er takmarkað pláss í smiðjurnar og er skráning því nauðsynleg.

Í lok smiðjanna verður sýning á Æði-flæði listaverkunum á Æskulýðsdegi Þjóðkirkjunnar þann 5. mars næst komandi kl. 11:00 í Hallgrímskirkju.

Fréttaritari kirkjan.is hafði samband við Kristnýju Rós Gústafsdóttur verkefnastjóra fræðslu- og fjölskylduþjónustu Hallgrímskirkju, en hún heldur utan um verkefnið, og spurði hana um aðdraganda þessarar nýjungar í safnaðarstarfinu.

Kristný Rós sagði:

„Starfsfólk Hallgrímskirkju vildi bjóða upp á nýtt, skapandi og öðruvísi starf fyrir börn og unglinga í Hallgrímskirkju.

Mig langaði til að nota öðruvísi, ferskt og opið nafn á verkefnið og úr varð Æði-flæði listasmiðjur.

Fólkið sem sækir þjónustu í Hallgrímskirkju býr ekki allt í sókninni og því var ákveðið að Æði-flæði væri ekki bara fyrir börn og unglinga í sókninni heldur fyrir hvern sem vildi, óháð búsetu.“

Hvað mun þetta verkefni standa lengi?

„Listasmiðjurnar standa í sex vikur, en það er takmarkað pláss í hverja smiðju.

Gestakennarar heimsækja Æði-flæði tvisvar sinnum.

Eftir hvert flæði fá börnin að heyra biblíusögu.“

Hvenær hefst þetta?

„Æði-flæði listasmiðjurnar verða í janúar og febrúar og svo enda allar smiðjurnar á því að vera með sýningu á listaverkunum á Æskulýðsdegi Þjóðkirkjunnar þann 5. mars næst komandi í fjölskylduguðsþjónustu í Hallgrímskirkju kl. 11:00.“

Lýkur verkefninu þá á Æskulýðsdaginn?

„Nei, Æði-flæði verður með nýjar smiðjur í vor, í apríl og maí og standa þær þá yfir í fjórar vikur.

Æði-flæði smiðjan í vor endar svo á því að taka þátt í vorhátíð í Hallgrímskirkju þann 16.maí næst komandi.“

Kostar þetta eitthvað fyrir börnin og unglingana?

„Nei, það er frítt að vera með og skráningar eru inn á heimasíðu kirkjunnar.“

Hvað verður aðallega gert?

„Það sem til dæmis verður gert í smiðjunum er að búa til sitt eigið spil, „diy tie“ boli og altarisdúk fyrir fjölskylduguðsþjónustur.“

Er skráning hafin?

„Já, og skráningar í smiðjurnar ganga vel.

Það er mikil tilhlökkun í kirkjunni fyrir nýja starfinu þar sem sköpunargleðin verður allsráðandi.

Hallgrímskirkja vill standa að fjölbreyttu og skapandi starfi í helgihaldi og safnaðarstarfi og Æði-flæði er hluti af því markmiði.“

Sagði Kristný Rós að lokum.




slg

Myndir með frétt