Áhugaverð fræðsla á foreldramorgnum

Handhafar hvatningarverðlaunanna

Foreldramorgnar eru mjög vaxandi vaxtarbroddur í kirkjunni.

Nú er meira um fræðslu á þessum morgnum en var hér áður fyrr og er áhugavert að skoða síður safnaðanna, en þar má oft sjá athyglisverða fyrirlesara og umfjöllunarefni.

Það má meðal annars sjá á síðu Bústaðakirkju að Carolina Schinder listmeðferðarfræðingur mun koma á foreldramorgun í kirkjunni á morgun, fimmtudaginn 23. febrúar kl. 10:00.

Hún mun fjalla um skynfæraverkefni í tengslum við tilfinningavinnu sem hún bjó til fyrir leikskólabörn á aldrinum eins árs til þriggja ára.

Carolina fékk nýverið hvatningarverðlaun Reykjavíkurborgar fyrir verkefnið sem sjá  má hér en þar segir m.a.

"Tilfinningaverkefnið í Hálsaskógi leggur áherslu á að vinna með skynúrvinnslu og skynupplifun yngstu barnanna í leikskólanum.

Í umsögn dómnefndar segir meðal annars að verkefnið taki með þessu mið af þörfum þeirra á einstaklings­bundinn hátt.

Öll börn þurfa tækifæri til að njóta styrkleika sinna sem er lykilþáttur í að byggja upp jákvæða sjálfsmynd. Carolina Schinder hefur leitt verkefnið."


Í Bústaðakirkju mun Carolina einnig fjalla um myndræna meðferðarnálgun sem hún sinnir í störfum sínum á Barna- og unglingageðdeild Landspítalans BUGL, þar sem hún starfar sem listmeðferðarfræðingur.

slg