Barnakór í Vídalínskirkju gefur út nýtt lag

Vídalínskirkja

Í Vídalínskirkju í Garðabæ er afar fjölbreytt tónlistarlíf.

Því er forvitnilegt að fá fréttir af því hvað þar er boðið upp á fyrir börn og unglinga.

Að sögn sr. Jónu Hrannar Bolladóttur sóknarprests í Garðaprestskalli þá er kór fyrir 6-9 ára, 10-12 ára, 13-15 ára á þriðjudögum og svo er það gospelkór Jóns Vídalín sem er fyrir 16 ára og eldri.

„ Við erum búin að vera með kórana í mörg ár“ segir sr. Jóna Hrönn.

„ Ingvar Alfreðsson og Davíð Sigurgeirsson stýra yngri kórunum og Davíð stýrir gospelkórnum.

Sigga Ózk hefur líka komið inn í starfið með unglingakórnum.

Gospelkórinn hefur verið í mörgum verkefnum og barnakórarnir eru að frumsýna nýtt sunnudagaskólalag ,,Ég held með þér” á æskulýðsdaginn 3. mars á netinu.

Það voru Davíð og Ingvar sem sömdu lag og texta með börnunum sjálfum.

Við fengum svo góðan tökumann og hljóðmann til að taka lagið upp og eftir frumsýningu á Æskulýðsdaginn fer lagið „Ég held með þér“ á spotify og youtube/Vídalínskirkja.

Af þessu tilefni voru búnir til bolir sem á stendur „Ég held með þér“ og Vídalínskirkja.

Börnin í kórunum hafa svo litað bolina í öllum regnbogans litum.

Allir þessir kórar hafa tekið þátt í sjónvarpsdagskrám, eins og Stundinni okkar.

Barnakórarnir sungu líka í sjónvarpinu með Sölku Sól eitt árið sem var mikil upplifun.

Gospelkórinn söng í jólaþætti stöðvar 2 og félagar úr gospelkórnum hafa verið í tónlistarþáttum Eyþórs Inga á stöð 2.

Svo er stór kirkjukór og svo Garðakórinn sem er kór eldri Borgara.

Barnakórarnir koma fram fyrsta sunnudag í mánuði í fjölskylduguðsþjónustu allan veturinn.

Í staðinn býður söfnuðurinn þeim á viku tónlistarnámskeið að sumrinu í Vídalínskirkju sem æskulýðsfulltrúi og kórstjórar leiða ásamt prestum.

Þar ríkir alltaf mikil stemning“ segir sr. Jóna Hrönn „og í lok námskeiðsins fara þau á dvalarheimilið að Hrafnistu í Hafnarfirði og dvalarheimilið Ísafold í Garðabæ og syngja fyrir heimilisfólk og starfsfólk og gleðja svo innilega.“

Hér fyrir neðan má sjá mynd af Gospelkór Jóns Vídalín.


slg

Myndir með frétt