Alþjóðlegi bænadagurinn á Egilsstöðum
Kirkjan.is sagði frá því fyrir helgi að Alþjóðlegi bænadagurinn hafi verið á föstudaginn og voru bænastundir víða um land.
Meðal annars voru samkomur í Vestmannaeyjum, á Egilsstöðum og í Húnaþingi og á fleiri stöðum á landinu.
Eins og fram kemur í fréttinni var bænadagurinn haldinn hátíðlegur á Austurlandi.
Að sögn sr. Kristínar Þórunnar Tómasdóttur, prests í Egilsstaðaprestakalli og tengils kirkjan.is á Austurlandi, þá hittist fólk til að biðja með orðum og reynslu frá konum í Landinu helga, kristnum konum í Palestínu, sem tengja lífsreynslu sína við landið, náttúruna og söguna.
„Í Kirkjuselinu Fellabæ, sameinuðumst við í bæn fyrir friði og fyrir öllum sem nú þjást vegna stríðs og ófriðar.
Gömul ólífutré, sítrusávextir, lífssögur og reynsla kvenna á sársaukafullum tímum í Landinu helga var inntak bænadagsins í ár.
Til að heiðra löndin við botn Miðjarðarhafsins reiddum við fram léttar veitingar sem tengja okkur í bragði, lykt og sjón við Landið helga og fólkið sem þar lifir.
Á altarinu var lítið sítrustré í sítrónukransi sem minnti á Landið helga og náttúru þess.
Á matarborðinu voru döðlur, möndlur, apríkósur, flatbrauð, alls konar ídýfur og sérlega ljúffeng kúskúskaka í boði organistans, Sigríðar Laufeyjar Sigurjónsdóttur.
Það var góð þátttaka í bæn og samstöðu um frið, umburðarlyndi og réttlæti í heiminum sem Guð elskar“
segir sr. Kristín Þórunn
Myndirnar hér fyrir neðan eru frá bænadeginum.
Sr. Sigríður Rún Tryggvadóttir, prestur í Egilsstsðaprestakalli og prófastur í Austurlandsprófastsdæmi blessar söfnuðinn.
slg
Myndir með frétt
