Minningarsteinn um Hallgrím Pétursson og Guðríði Símonardóttur verður settur upp í sumar
Sr. Kristján Valur ábúandi í Saurbæ-mynd hshFyrsti aðalfundur Hollvinafélags Hallgrímskirkju í Saurbæ var haldinn 30. apríl síðastliðinn.
Skráðir félagar eru nú 80 talsins.
Formaður félagsins Birgir Þórarinsson flutti skýrslu stjórnar og gjaldkerinn Margrét Bóasdóttir gerði grein fyrir fjármálastöðunni.
Lög félagsins sem lögð voru fram á stofnfundi þann 27. október árið 2023 voru yfirfarin og samþykkt með nokkrum breytingum.
Að sögn Margrétar Bóasdóttur var fundurinn vel sóttur og var farið var yfir þau verkefni sem nú þegar er verið að vinna að, kynntir styrkir sem félagið hefur fengið og helstu verkefni sem framundan eru.
„Á fundinum kom fram að verið er að gera minningarstein um Hallgrím Pétursson og Guðríði Símonardóttur sem verður settur upp í sumar, en steinninn sem nú er á gröf Hallgríms verður fluttur inn í kirkjuna“ segir Margrét.
„Gert verður við altarismynd kirkjunnar sem skemmdist vegna raka og ný ljósahönnun kirkjunnar er komin á rekspöl.
Einnig kom fram að Hallgrímslind verður lagfærð og umhverfi hennar.
Hollvinafélagið kemur að hátíðardagskrá Hallgrímshátíðar í haust í tilefni af 350. ártíð Hallgríms Péturssonar 27. október.
Hallgrímsdagar á hausti sem haldnir hafa verið undanfarin tvö ár verða með fjölbreyttri menningardagskrá, hátíðarmessu 27. október á dánardegi skáldsins, messukaffi í Vatnaskógi og dagskrá í kirkjunni þar sem meðal annars verða frumflutt tvö kórverk við texta Hallgríms Péturssonar."
Stjórn félagsins var endurkjörin á fundinum, en þau eru Birgir Þórarinsson, sem áfram verður formaður, Margrét Stefánsdóttir, ritari, Margrét Bóasdóttir, gjaldkeri og meðstjórnendur eru Þráinn Haraldsson og Helga Viðarsdóttir.
Í varastjórn sitja Valdís Valgarðsdóttir, Sigurður Grétar Sigurðsson og Geir A. Guðsteinsson.
Þeim sem vilja ganga til liðs við Hollvinafélagið er bent á að senda tölvupóst á netfangið kvi@hi.is.
Myndirnar sem fylgja fréttinni tók sr. Hreinn S. Hákonarson.
slg
Myndir með frétt
