Þrjár umsóknir bárust
Reykholtskirkja hin nýja, vígð 28. júlí 1996, og hin eldri, vígð 31. júlí 1887 - mynd: hshBiskup Íslands óskaði nýlega eftir sóknarpresti til þjónustu í Reykholtsprestakalli, Vesturlandsprófastsdæmi.
Miðað var við að viðkomandi geti hafið störf 1. desember 2024.
Þrjú sóttu um starfið, María Guðrúnar Ágústsdóttir sóknarprestur í Fossvogsprestakalli, en tvö óska nafnleyndar.
Reykholtsprestakall
Reykholtsprestakall er í Vesturlandsprófastsdæmi.
Prestakallið nær yfir efri hluta Stafholtstungna, Hvítársíðu, Hálsasveit, Reykholtsdal, Flókadal Bæjarsveit, Andakíl, Lundarreykjadal og Skorradal.
Í prestakallinu eru sex sóknir, Bæjarsókn, Fitjasókn, Hvanneyrarsókn, Lundarsókn, Reykholtssókn og Síðumúlasókn.
Kirkjurnar eru átta talsins auk einnar kapellu.
Starfinu fylgja viðbótarskyldur við önnur prestaköll í prófastsdæminu, önnur prófastsdæmi, sem og við Þjóðkirkjuna og önnur kirkjuleg stjórnvöld.
Allar gildar umsóknir fara til valnefndar sem fer yfir allar umsóknir og boðar umsækjendur til viðtals innan þriggja vikna frá lokum umsóknarfrests, sbr. 8 gr. starfsreglna um ráðningu í prestsstörf.
Valnefnd skal ná samstöðu um einn umsækjanda en valið skal byggt á fyrirliggjandi þarfagreiningu og rökstutt á grundvelli hennar.
Í framhaldinu ræður biskup viðkomandi í starfið, að því gefnu að hann telji niðurstöður valnefndar reistar á lögmætum sjónarmiðum.
slg
