Prédikun í Grensáskirkju 28.
nóvember 2021 kl. 11 Fyrsti sd. í aðventu
Lexía: Jes. 62:10-12
Pistill: Rm. 13:11-14
Guðspjall: Mt. 21:1-11
Biðjum:
Kenn
mér Jesús, þér að þakka,
þína
trú og bænargjörð
Yfir
mér og í mér vaki,
elskan
þín á himni og jörð. Amen.
Náð sé með yður og friður
frá Guði föður vorum og Drottni Jesú Kristi. Amen.
Liðböndin
Í
líkama fullorðins manns eru 206 bein. Sinar tengja bein við vöðva og liðbönd
tengja bein við bein. Þetta eru kannski fræði sem maður lærir frekar í námi í
sjúkraþjálfun, heldur en í guðfræðinni.
Enska
orðið yfir liðband er ligament, sem dregið er af latneska orðinu, ligamentum,
sem þýðir samkvæmt orðanna hljóðan: „Að tengja saman“. Liðbönd líkamans eru
fleiri hundruð, ef ég þekki rétt. Liðböndin halda líkamanum því saman, tengja
bein við bein.
Íþróttafólk
lendir stundum í því, eins og við þekkjum, að rífa liðbönd eða slíta, þá þarf
stundum aðgerð, þar sem liðbönd eru tengd á ný og saumuð saman.
Ef
við leikum okkur aðeins meira með þessi erlendu hugtök, þá þýðir latneska orðið
religamentum: „bindiefni eða það að tengja saman á ný“.
Þaðan
er dregið enska hugtakið religion, sem við þýðum á okkar ilhýra: „Trú eða trúarbrögð“.
Liðböndin
og trúin
Trúin,
okkar kristna trú, er því viðleitni okkar til að tengjast á ný.
Já,
tengjast hverju?
Stundum
er talað um þrenns konar mikilvægar tengingar sem manneskjunni eru nauðsynlegar
til að lifa heilbrigðu lífi.
Það
eru tengsl við sjálfan sig. Hver er ég? Hvaðan er ég? Hver eru hlutverk mín í
heiminum? O.s.frv.
Það
eru síðan tengsl manneskjunnar við náunga sinn. Það er að segja tengsl okkar
við samferðarfólk, ættingja, vini, samstarfsfólk, alla sem verða á vegi okkar á
lífsleiðinni.
Í
þriðja lagi eru það síðan tengsl okkar við okkar æðri mátt. Tengsl við Guð.
Kirkjan
er vettvangur þessara tengsla. Kirkjan er vettvangur þess að við fáum tækifæri
til að rækta þessi þrennskonar tengsl og þá fyrst og fremst kannski þau
síðastnefndu. Tengsl okkar við Guð.
Trúin
er þá kannski samkvæmt hinum fornu hugtökum leið okkar til að endurnýja
tengslin við frumkraft tilverunnar.
Að
koma á tengslum á ný við uppsprettu lífsins, að tengjast á ný því sem er æðra
okkur, sem við nefnum á tungutaki kirkjunnar, skapara, frelsara og helgara
lífsins, Guð.
Eins
og liðbönd líkamans halda honum saman, þá má segja að það sé eitthvað andlegt,
eitthvað samfélagslegt, eitthvað utan við okkur sjálf, sem heldur okkur einnig
saman, sem heild, sem heilbrigðum manneskjum, sem samfélagi.
Golf,
Rotary eða tónlistarskólinn
Kannski
getur það verið ýmislegt sem tengt er áhugamálum. Golfarar sem leika sér á
hinum grænu grundum, virðast á stundum, í iðkun sinni og íþrótt, verða tengdir
einhverju æðra, einhverju meiru en bara þeim sjálfum. Eins getur ýmis
félagsskapur verið vettvangur þess að fólk finnur merkingarfullar tengingar og
lífið verður ríkara, eins og til dæmis þátttaka í Rótarý, Oddfellow, Lions eða
Frímúrarareglunni, svo eitthvað sé nefnt.
Iðkun
tónlistar getur einnig virkjað svona helga krafta, sem glæða ýmsar tengingar í
okkar lífi og gera lífið ríkara.
Hinir
fornu textar
Hinir
fornu textar sem við lesum í dag á fyrsta sunnudegi í aðventu, miðla okkur því
að Guð vill einnig vera í tengslum. Það er ekki bara maðurinn og þörf okkar,
sem ræður ferðinni, heldur vill Guð einnig eiga frumkvæði að slíku.
Þessir
textar hafa um langan aldur verið þeir textar sem ávallt eru lesnir á þessum
degi kirkjuársins.
Hver helgur dagur hefur
sína texta, þ.e.a.s. alltaf eru nýir og nýir textar lesnir á hverjum sunnudegi,
og í kirkjum landsins er lagt upp með sömu textana hvern helgan dag.
Textar Biblíunnar, þótt
skrifaðir séu af yfir 40 höfundum á 1500 ára tímabili í þremur heimsálfum, eru
síðan tengdir á óendanlega fjölbreyttan og flókin máta. Ef það væri svona
„hyperlinkur“ eins og við þekkjum á netinu, sem tengdi eitt vers við annað, þá
væru bækurnar og boðskapurinn tengdur þvers og kruss í allar áttir, því þannig
eru þær í raun, tengjast innbyrðis líkt og æðakerfi líkamans.
Konungur
þinn kemur til þín
Í
texta dagsins er talað um konunginn sem kemur til þín, hógvær er hann og ríður
asna fola undan áburðargrip.
Það
er einhver þverstæða fólgin í því að tala um Guð og hógværð, í sömu setningu.
En þó, það er einmitt það sem Jesús boðar með verkum sínum: Hógværð, lítillæti,
en um leið, hugrekki og dirfsku.
Í
þessum árþúsunda texta úr Mattheusarguðspjalli er teiknuð upp þessi fallega
mynd af fjöldanum sem tekur á móti Jesú í Jerúsalem. Klæði lögð á veginn og
pálmagreinar.
Pálminn
hafði táknræna merkingu fyrir gyðinga þess tíma. Þannig var döðlupálminn tákn á
myntum. Pálmagreinarnar vísuðu til bæði sigurs en einnig friðar. Hósíanna
hrópið, er einnig nátengt pálmagreinunum.
Pálmagreinarnar
eru tákn fyrir Jesús, sem konung, sigurtákn, sem undirstrikar hver hann er, sem
Messías og frelsari þín og mín, frelsari heimsins.
Þessi tími ársins
Þessi tími ársins,
aðventan og jólin fjalla einmitt svo mikið um það að virkja ofurkraftinn sem
býr í samfélaginu. Þann ofurkraft sem leysist úr læðingi er við hugsum um aðra,
gleðjum aðra, og leggjum okkar að mörkum sem enginn finni sig út undan, allir
séu með, allir fái að eiga glaðan dag.
Í dag er einmitt
upphafsdagur jólasöfnunar Hjálparstarfs kirkjunnar. Skrifstofa Hjálparstarfsins
er nú einmitt hér í þessu húsi, Grensáskirkju, eins og þið þekkið. Stuðningur
við starf Hjálparstarfsins, er stuðningur við alla þá sem eru hjálparþurfi.
Hjálparstarf kirkjunnar er farvegur fyrir fjármuni og krafta til þeirra sem á
þurfa að halda.
Öll erum við einhvern
tímann í þeirri stöðu í lífinu að þurfa að aðstoð að halda, öll þurfum við á
öðrum að halda.
Allir geta líka lagt að
mörkum, enginn getur gert allt, en allir geta gert eitthvað.
Hjálparstarf kirkjunnar
sinnir margvíslegu starfi og þjónustu hér innanlands, eins og neyðaraðstoð,
valdeflingu, málsvarastarfi, og síðan rekur Hjálparstarf kirkjunnar Skjólið,
sem er dagsetur fyrir heimilislausar konur. Hjálparstarfið veitir ríka
jólaaðstoð núna fyrir jólin og eru barnafjölskyldur þar í forgangi, ef ég þekki
rétt.
Í fyrra fengu 1707
fjölskyldur um land allt inneignarkort fyrir matvöru og fleira, fyrir jólin, og
er búist við svipuðum fjölda umsókna nú í ár. Auk inneignarkorta fær fólk í
brýnni þörf notaðan sparifatnað og foreldrar fá m.a. aðstoð svo börnin fái
jóla- og skógjafir. Aðstoðin er veitt í góðri samvinnu við Hjálpræðisherinn,
Rauða krossinn, Mæðrastyrksnefndir og kirkjusóknir vítt um landið og með
frábærum stuðningi frá einstaklingum, félögum og fyrirtækjum.
Við skulum styðja
Hjálparstarfið til góðra verka.
Merki Hjálparstarfs
kirkjunnar er kross, fiskur og skál. Krossinn er þungamiðja merkisins.
Fiskurinn sem er honum samofinn er eitt af elstu táknum kristinna manna. Á
grísku er orðið fiskur stafað IKÞYS; Það er einnig skammstöfun á orðunum Jesús
Kristur Guðs Son Frelsari. Fiskurinn er því frá öndverðu tákn um Krist sem frelsara
mannanna. Að auki vísar fiskurinn á kraftaverkið sem guðspjöllin greina frá, er
Jesús mettar mannfjöldann með fimm brauðum og tveimur fiskum. Fiskurinn á merki
Hjálparstarfsins er þá einnig tákn um viðleitni stofnunarinnar að gefa
hungruðum heimi fæðu og þeirri hugsun tilheyrir einnig skálin sem undirstrikar
merkið.
Frásögur aðventunnar og
jólanna eru eins og hvatningarfrásögur þess efnis að við eigum að virkja
ofurkraftinn í samfélaginu öllum til heilla.
Leggjum okkar að mörkum
svo að það megi verða.
Dýrð sé Guði, föður og
syni og heilögum anda. Svo sem var í upphafi, er og verður um aldir alda. Amen.
Takið postullegri kveðju:
Náðin Drottins vors Jesú Krists, kærleiki Guðs og samfélag heilags anda, sé og veri með yður öllum. Amen.
